نویسندگان
تبلیغات
کد HTML تبلیغ
بازدید از سایت
امروز : ۲ آذر ۱۳۹۶
بازدید امروز : 2431
بازدید دیروز : 2456
تعداد نظرات : 3398
تعداد مطالب امروز :0 عدد
تعداد مطالب : 1792
کل بازدیدها : 9772896
خروجی فید امروز : 22
ورودی گوگل امروز : 13
افراد آنلاین :14 نفر

 

آدم باضي وختان ، چي خاباني دينه ؟ پريشبا خاب بيدام ، كي رنگه دونيا واگردسته ، دونيا ايتا خورمه دونيا ببوسته ، لاب جه آسايش پورا بؤسته . گيدي ، خاب آدمه خيياله زاكه ، خاباني كي دينيم ، هون نأجه ياني ايسه ، كي وختي بيدار ايسائيم ، به اَمِه كلّه زنه ، و اَمان اوشانا خييال چاكنيم .ولي اَ حرف ، مِه خابه مرَ جور در نايه ، چُن من هي وخت ئي چيز نخاستَمه كي بؤستني نيبه . خاب بيدام كي جنگ جه دونيا بكفته ، اسلحه چاكُني كار خانه ئن تاطيل و دبسته ببوسته . محلّه ئنه مئن ، دِ آدمه ولگرد پئدا نيبه ، پسران دِ  دوخترانا متلك نيگيدي ، لاتان دِ كس كسه ره چاقو فانكَشَد، اصلن لاتي د پئدا نيبه ، دِ موجرم و موزاحم نئسا . هَنه واستي كلانتريان ، جه ئي سره دبسته ببوستا ئيد ، زناكان  و مرداكانه مئن ، دِ شكَر آو نيبه ، دِ كس كسه ره عرضحال نينيويسيد . دِ مالك ، خؤ موستاجره خونا فوندوشه، دِ طلبكاره مالا، بديكار ، بوجؤر وُنكوشه ، دِ هي كس، هي كسا نارو نزنه ، كلك نزنه ، كولا اوساني نوكنه . هنه واستي ويشتره دادگاهان و دادسراهان بيكارا بوستا ئيد ، پاك دبسته ببوستا ئيد .
دِ همّه تا عاقيلا بوستائيد ، هرچي كي اوشانه ، جانه ساقي ره ضرر داره ، اونه دومبالا نيشيد ، هَنه وستي دِ قومار و الكل و سيگار و ترياك و شيره و چرس و بنگ و مورفين و هيروئين و ال.اس.دي و حشيش و ماري جوانا و كراك و قورص و اَ جور چيزان ، دِ پاك اوچيناسته ببؤسته ، هيزار هيزار نفر كي جه اَن را نان خورديد، بيكار و بي نان ببوستا ئيد . دِ مواده غذائي مئن ، تقلب ننأ . ويشتره موسسه ئني كي،در چاكودنه روغن اعلا،ماست اعلا، عسل اعلا مارفي ببوستابيد،ورشكسته و سر شكسته ببوستيد . مردوم دِ غذا خوري مئن ، پور خوري نوكُنيد . خؤشانِه مئماني يانِه مئن ، دِ فُكن و فيشان نوكُنيد . خانه داران دِ ساق و ساليم و بهداشتي غذا خوريد ، هَنه واستي د ِ اغذيه فوروشان و روستورانانه دوكان ، پاك تخته ببوسته . جه اوطرف ، چُن پور خوري نوكُنيد و غذا خوردنه مئن ، اندازه يا داريد ، هَنه واستي د مريضا نيبيد ، تومامه درمانگاهان و بيمارستانان ، هَتو خالي كفتائيد.هيكس دِ موقرراته رانمائي و رانندگي مئن ،خلاف ملاف نوكنه ، هنه واستي هَتو تق و لق كفتائيد .
مردومه عقل و فيكر،بوجؤر بوشؤ داره، دِ هيكس خؤ ديله
هوسه دومبال نوشوئي، هَنه واستي اوشاني كي ، جه سر صدقه مردومه تجمل پورَستي،نان خورديد،طراحانه مُ دو فوروشنده ئنه زينت آلاتا مانستن ، همّه تانه نان آجور ببؤستابؤ.هيكس دِ به فيكِر نوبؤ، كي خؤرا مشهورچأكُنه، هيكس دِ به اَچيزان خؤ ديلا خوشا نوكودي، هنه واستي بؤ كي جوانان، دِ شعر و ناقاشي و ساز و آوازه هونرانه دومبال نوشوئيد ، نه خؤشانا سختي ديهيد ، نه مردومانا درده سر. جه دوزدي ، جه آفتابه دوزدي ، جه زاي دوزدي ، جه طياره دوزدي ، دِ زيمين و آسمانه جأ ، خبري نوبؤ. جه آدم كوشي يم ، خبري نوبؤ . هيكس جه قانون فيرار نوكُوده، هيكس نيقابه تجارته جير، دِ احتكار و بچاپ بچاپ نوكوده . هيكس ايتا دسماله واستي، ايتا قيصريه يا به آتش فانكشه ئي. دِ هيتا سياستمدار، چنتا اسلحه يا ايمتحان كُدانه واستي،دو تا ملّتا كس كسه جان تانَه وَده .

بيدامه زينديگي آراما بؤسته ، نه سري نه صدائي ، نه ايتا ماشينانه توصادف ، نه ايتا آتش سوجي ، تا مردوم تامشا بوكُنيد . نه روزنامه ئنه حوادثه صففه ايتا داغه خبري داره ، اصلن روزنامه ئن هچي ناريد تا بينيويسيد ، راديوئن و تيلوزيونان ، هچي ناريد تا بيگيد ، خبر گزاري يان ، دِ خؤشانه جول و پلاسا جما كودائيد ، كيتابان نه ايتا عقشي داستاني ، نه ايتا پوليسي داستاني ، ويشتره دسگاهاني يم كي مردمه خلاف كودان و نوره بازي يانه واستي واكوده ببؤستابيد ، دبسته ببؤستائيد . زينديگي ببوسته ، ايتا شيري كي نه يال و نه دوم و نه شكم و هچي ناره . زينديگي پاك لاما بؤسته ، لوسا بؤسته ، گرمي ناره ، پاك ببوسته ايتا اَبچه زينديگي . هيتا حيوانا دِ هيكس نوكوشه، آدمان همّه تا سبزي خور ببؤستائيد . هيكس دِ ايتا توكّه خون زيمينه سر فونكُنه ، اصلن هيكس نأنه خون چي رنگي ايسه . هيكس ، هيكسه سرا كولا ننهه ، هيكس، جه هيكسه دس شكايت مكايتي ناره ، آي تا نخشه نكشه اوي تا ره پاپوش بودوجه ، هيكس درده سره دومبال ني شه . مردوم گيرفتاري ناريد ،موشكلي ناريد،تا حل بوكُنيد.جه بيكاري همه كسان بوصله باموئيد ، لاپ ديق كودان دريد.تازه بفامستائيد،اَني كي ايتا عومر گوفتيد:« بهشت اويا ئي ايسه كي آزاري نيبه، هيكسا ، هيكسه اَمرَ كاري نيبه »ايتا پيلي دانه غلطه ، اگه اَتوئي بَخَيه ببه ، پس اويا جهندمه جأ ، بدتره . آدمان بيدي عينه حيوان ، كي ايتا چراگا مئن ، فقد چَرَستان دريد ، خوردان دريد ، خوفتان دريد ، هيكسم ، هيكس موزاحم نيبه . ياني ، زينديگي بادز چن قرن تمدن ، ايدفا حيواني ببوسته ؟ نه كولا نهني ، نه خالي دبَستني ، نه كلك زئني ، نه كوشت و كوشتاري ، نه گوش وابني ، نه دوماغ سوجانني، نه اويرا كوداني … اَن كي به خوشكه خالي زينديگي ، هَنم انسانيته ؟ اَ نَم ببوسته زينديگي ؟! خابه مئن بيدام ، هَتو جه زينديگي وازده بومامه كي ، لاپ د ِ خَيَم مرَ بوكوشم ، اَرا ، اورا گردمه ، ايتا خنجره دومبال ، تا فوزونم مه ديله دورونا ، مه كارا توماما كُنم . هَه موقه ، ايدفا مه زناك ، ئيجگره بزأ ، جه خاب دَ پَركَستم ، بوگوفت : « چي كودان دري مَرداي ، مه چوما كورا كودي . » مالوم ببؤست ، خابه مئن ، چنگ تاودامه ، اونه سر و چوما ، عوضه خنجره واقعي ، مِه ياره اَبرو خنجرا بيگيفتامُه .

.

نيويسنده : ابوالقاسم حالت
واگرداننده : كاس آقا
منبع: gile-tanz.gilblog.ir
عکس: خانم پریسا میرنظامی
گردآورنده: سایت کرکان بندرانزلی

بازدید:3,286بار , ارسال شده در : ۳ام بهمن, ۱۳۹۰; ساعت : ۷:۱۷ ق.ظ
تعداد نظرات : ۰
آرشیو مطالب
ارسال نظر جديد
در زمینه‌ی انتشار نظرات مخاطبان رعایت چند مورد ضروری است:
  • لطفاً نظرات خود را با حروف فارسی یا گیلکی تایپ کنید.
  • نظرات در ارتباط با همین مطلب باشد در غیر اینصورت از « فرم تماس با مدیریت » استفاده کنید.
  • «مدیر سایت» مجاز به ویرایش ادبی نظرات مخاطبان است.
  • از انتشار نظراتی که حاوی مطالب کذب، توهین یا بی‌احترامی به اشخاص، قومیت‌ها، عقاید دیگران، موارد مغایر با قوانین کشور و آموزه‌های دین مبین اسلام باشد معذور یم.
  • نظرات پس از تأیید مدیریت سایت منتشر می‌شود.



جستجو
مدیریت
سایت کرکان بندرانزلی با دامنه
www.kargan.ir
نیز در دسترس می باشد.
مرحوم تقی کرکانی خان قدیم کرکان

روستای کرکان در منطقه جلگه ای و در کنار جاده کپورچال-آبکنار واقع شده دارای نسق 85 ساله (تاتاریخ 1363 شمسی)بوده و از نظر ثبتی جزء بخش 7 حومه انزلی و سنگ شماره 6 میباشد و مسافتش تا کپورچال 7 کیلومتر و تا انزلی 27 کیلومتر است . . .

شبکه های اجتماعی کرکان

شماره تلفن تلگرام :0016624759892
تبلیغات
HTML
محبوب ترین مطالب
آرشیو ماهانه

برای اشتراک در خبرنامه کرکان ایمیل خود را در کادر زیر وارد نمایید